|
نجمة بعيون العراق
يابطل ياسيد الحگ والوفاق صِغت من الطاف حبك نجمه بعيون العراق يالعبير الدم تنفَّس صبرك وصرَّح بحبك للعراق ادري گلبك ينثر اورود المحبه ويهدم اجبال الشقاق ادري منهاجك رسمته من سراديب الخناق وشيَّدت منه مدينه اترفرف اعليها بيارغ للوفاق ادري انته الگلب الاكبر والصبر منك تعلم منهجة وكل الرفاق انته ياأكبر مساحه وخارطه شالت عراق بس شبگتك بس حضنتك شفت بين ارموش عينك ألم وجهي وافزعت من الفراق يابطل يازارع الود يالنثرت من الصبح ورد الصراحه ونگِّطن ويَّه الهوى الخجلان گطرات العذاب وصافحت چف البراءه وبوَّست خد الغياب وانتچيت اعلى الكواكب وازرعِت بالأفق نغمات النجاح وقررِت تمحو السراب وماوصل تاج لمداك يالمداك اشكثر عالي يارضا وياگلب راضي شفتك بوجه المضايف ياهله ومرحبه وياضحكة عذاب شفتك بليل الهضيمه غازَلِت خد المودَّه واشبگت خُصر الثريه ونِمِت بخدود الزمان نومة التعبان لو عَض التراب يابطل يا جبل عالي صاعد ابچبد الزمان وجاثم بصدر العده شفت بعيونك براءه وهالبراءه الخالده كلمن ايعاينها يهواك ونشيده ايردده يل بچاك الدرس واشتاگ الكتاب اني اعرفك انته َجنَّه وگاع خضره تزرع وتحصد عذاب بعالم التكفير والذل والخراب صغت من جوهر حياتك عقد مابالسوگ منَّه ولالبس منها الشباب ودوَّن المجروح فكرك والخواطر طاحن بحضنه خطاب وهتفن بحب العقيده وارتوه بأعذب شراب لاچن بسود الليالي خطفتك چف المنيه والقلم ينعاك ودالك عتاب وانه ياسيد اشبيدي شبيدي والايام تلعن قاتلي وتدفن عذابي شبيدي والدفتر تمزگ وانطوت صفحة كتابي شبيدي يوم المزِّگت جسمك وجسمي وقدموه حگ للذئاب هذا كل فعل الرفاق وسوَّت بذكرى وفاتك فاتحه وعقدت عزاك وقررت للقاتل اتقلده وسام يوم من اغتالتك چف الطغاة ابدال الملبس يسيد رشوا اعليك السهام وغنوا بلحنك قصيده وهتفوا بأسم النفاق
|
